Intro text

Novruz bayramı ərəfəsində Norm MMC-nin əməkdaşları Bakı şəhəri, Qaradağ rayonu, Sahil qəsəbəsi, Emin Quliyev adına Sağlamlıq imkanları məhdud uşaqlar üçün 9 saylı xüsusi internat məktəbinə səfər etmişlər.

Səfər öncəsi məktəb rəhbərliyi məktəbdə təhsil alan uşaqların idmanla daha ciddi məşğul ola bilmələri üçün müvafiq imkanların yaradılmasına zərurət olduğunu bildirmişdir.

Bu məqsədlə geniş çeşiddə, müxtəlif yönlü trenajorlar, turniklər, ağır atletika ştanqaları, espanderlər, basketbol və voleybol ləvazimatları, velotrenqjorlar, qantellər və digər idman ləvazimatları məktəbə hədiyyə edilmişdir.

Məktəbin direktoru Xanımqız Şükürova hədiyyələrə görə şirkətimizə öz təşəkkürünü bildirmiş, məktəbin şagirdlərinin idman sahəsində gələcəkdə uğurlar qazanmasında bu ləvazimatların böyük rol oynayacağına əmin olduğunu ifadə etmişdir.

Bakıda 10-dan artıq ölkəni təmsil edən mötəbər qonaqların iştirakı ilə “Modernləşmə siyasəti: yeni iqtisadi və sosial çağırışlar” mövzusunda keçirilmiş beynəlxalq konfransda modernləşmə siyasətinin və iqtisadi islahatların vacibliyi vurğulanıb.

Konfransa toplaşan siyasətçilər, alimlər, ictimai xadimlər ölkəmizdə həyata keçirilən islahatları yüksək qiymətləndiriblər. Aparılan islahatlar hazırda iqtisadiyyatın bütün sahələrdində öz bəhrələrini verməkdədir. Son illərdə tikinti sektorunun sürətlə inkişafı, ölkədə həyata keçirilən iri infrastruktur layihələri, habelə yaşayış binalarının və fərdi evlərin tikintisinin geniş vüsət alması sementə olan tələbatı artırmışdır.

Bu sahədə ölkə iqtisadiyyatına öz töhfəsini vermək üçün “Norm” şirkəti regionda ən iri sement zavodu inşa etməyi qərara almışdır. Layihəyə sement sənayesinin aparıcı yerli və xarici mütəxəssisləri cəlb olunmuş, geniş elmi-tədqiqat, geoloji kəşfiyyat işləri aparımış, layihənin texniki konsepsiyası, eləcə də maliyyə-iqtisadi  planı hazırlanmışdır.

İstehsal gücü gündə 5 min ton klinker, ildə isə 2 milyon ton sement təşkil edən zavodda tətbiq ediləcək müasir “quru üsul” texnologiyası texnoloji prosesdə minimum enerji sərfiyyatı ilə yanaşı, yüksək keyfiyyətli xüsusi sement növlərinin istehsalına imkan verəcəkdir.

İstehsalda ən son innovasiyalara üstünlük verilməsi, dünyada mövcud olan ən müasir texnologiyaların və Alman istehsalı olan avadanlıqların tətbiq edilməsi Avropanın ən sərt ekoloji standartlarına riayət olunmasını, istehsalın səmərəliliyini və enerjiyə maksimum qənaəti təmin edəcəkdir.

Azərbaycanın sement sənayesində ilk dəfə olaraq “bay-pass” sistemi tətbiq ediləcəkdir ki, bu da sementin yüksək keyfiyyətinə təminat verəcəkdir. Zavodun istehsal gücü və Alman texnologiyası ilə istehsal ediləcək keyfiyyətli məhsulu zavoda cənubi Qafqaz və Xəzər regionu ölkələrinin sement bazarında özünəməxsus yer tutmaq imkanı verəcəkdir.

Bu günə qədər Xəzər bölgəsində istehsal edilməyən, API standartlarına uyğun quyu sementinin istehsalı Azərbaycanı bölgənin neft hasilatçıları üçün sement ixracatçısına çevirəcəkdir. Zavodun fəaliyyətilə bağlı illik xammalın və hazır məhsulun nəqliyyat dövriyyəsi 5,5 milion ton təşkil edəcəkdir ki, bu da öz növbəsində nəqliyyat sahəsində yeni perspektivlər açacaqdır.

İstehsal ediləcək 2 milyon ton yüksək keyfiyyətli sement, idxalın həcmini azaldacaq və ölkəmiz hər il idxala sərf edilən 150 milyon ABŞ dolları həcmində valyutaya qənaət edəcəkdir.

“Qızıldaş Sement” layihəsi sıfırdan qurulduğundan ərazilərdə əsaslı infrastruktur yaradılacaq; hal hazırda yarımsəhra tipli torpaqlarda yaşıllaşdırma, abadlaşdırma işləri aparılacaq; müxtəlif yardımçı kommunikasiyaların çəkilməsi ətrafdakı yaşayış məntəqələrinə də xidmət etməklə əhalinin həyat səviyyəsinin yüksəlməsinə gətirib çıxaracaqdır.

Zavodun fəaliyyətinin ilk on ili ərzində Azərbaycan büdcəsinə təxminən 200 milyon manat vergi ödənəcəkdir. Azərbaycanda istehsal edilen sementin və hazır betonun keyfiyyeti daha da yüksələcəkdir.

Zavodun tikintisi qeyri-neft sektorunun ən böyük investisiya layihələrindən biri olub təxminən 400 milyon ABŞ dollarına başa gələcəkdir. Sement istehsalı müəssisəsinin yaradılması xoş amallara xidmət edir. Sülh və inkişaf rəmzi olan bu layihə Azərbaycanın iqtisadi potensialını artıracaq və insanlara xoş güzəran bəxş edəcəkdir.

 Dekabrın 21-də Bakıdakı “JW Marriott Absheron” otelində Norm MMC-nin “Qızıldaş Sement” zavodunun əsas texnoloji avadanlıqlarının Almaniyadan idxalının PAŞA Bank ASC-nin zəmanəti ilə Commerzbank tərəfindən maliyyələşdirilməsinə dair müqavilə imzalandı.

Zavodun əsas texnoloji avadanlıqları Almaniyanın bu sahədə aparıcı şirkətləri olan Hazemag, Pfeiffer, Claudius Peters, Siemens, Aumund və Haver&Boecker tərəfindən təchiz  edilir. Almaniyada istehsal edilən bu avadanlıqların bir qismi artıq Azərbaycana gətirilib.

Bu avadanlıqların idxalının maliyyələşdirilməsi ilə bağlı Almaniyanın bir sıra maliyyə qurumları ilə danışıqlar aparılıb və Norm MMC-nin korporativ idarəetmə modeli və şəffaf maliyyə strukturu bu qurumlar tərəfindən təqdir edilib. Nəticədə, Alman İxrac-Sığorta Agentliyi – Euler Hermes və PAŞA Bankın zəmanəti ilə Almaniyanın beynəlxalq miqyaslı bankı Commerzbank tərəfindən 22.3 milyon ABŞ dolları həcmində 7 il müddətinə kredit ayrılması barədə razılıq əldə edilib. Yeri gəlmişkən Almaniyanın aparıcı maliyyə institutlarının Azərbaycan şirkətinin maliyyələşdirilməsində fəal iştirakı ölkəmizə olan etimadın göstəricisi kimi qiymətləndirilə bilər.

Zavodun cari ilin mart ayında başlanmış geniş miqyaslı tikinti işləri hazırda sürətlə davam etdirilir. Bundan əlavə zavod ərazisinə 10 km uzunluğunda, müasir tələblərə cavab verən avtomobil yolu, yüksək gərginlikli elektrik xətti, su kəməri və fiber optik kabel xətti çəkilib. Hal hazırda əsas istehsal binalarının bünövrə-betonlama işləri başa çatdırılıb və yerüstü tikinti işləri davam etdirilir. Yaxın günlərdə avadanlıqların quraşdırma işlərinə başlanacaq.

Bakının Qaradağ rayonunda inşa edilən zavodun istehsal gücü gündə 5 min ton klinker, ildə isə 2 milyon ton sement təşkil edəcək. Zavod Qafqazda və Xəzər dənizi regionunda ən iri sement istehsalı müəssisəsi olacaq.

İstehsalda ən son innovasiyalara üstünlük verilməsi, dünyada mövcud olan ən müasir texnologiyaların və avadanlıqların tətbiq edilməsi Avropanın ən sərt ekoloji standartlarına riayət olunmasını, istehsalın səmərəliliyini və enerjiyə maksimum qənaəti təmin edəcək.

Zavod müasir texnologiyaların tətbiqi sayəsində Azərbaycanda, habelə Xəzər bölgəsində ilk dəfə olaraq neft sənayesi üçün API standartlarına uyğun xüsusi növ quyu-tamponaj sementi istehsal etməyə imkan verəcək.

Bu layihə yeni iş yerlərinin açılması baxımından da böyük əhəmiyyət kəsb edir. Belə ki, bilavasitə zavodda 400 nəfər, xammal mədənlərində isə daha 100-150 nəfər işlə təmin ediləcək. Bundan əlavə istehsaldan satışadək, o cümlədən kimya, nəqliyyat, yanacaq, qida və digər xidmət sahələri üzrə yüzlərlə yeni iş yeri yaradılacaq.

Qeyri-neft sektorunun ən iri layihələrindən biri olan Norm MMC-nin “Qızıldaş Sement” zavodu plana əsasən 2013-cü ilin sonuncu rübündə istismara veriləcək və zavod ölkəmizin iqtisadi qüdrətinin daha da artmasına öz layiqli töhfəsini verəcək.

Ötən 2012-ci ilin noyabr ayı ərzində Norm MMC-nin əməkdaşları Bakı şəhəri, Qaradağ rayonu, Sahil qəsəbəsi, Emin Quliyev adına Sağlamlıq imkanları məhdud uşaqlar üçün 9 saylı xüsusi internat məktəbinə xeyriyyə məqsədilə iki dəfə səfər etmişlər. Səfər zamanı əməkdaşlarımız uşaqlarla görüşmüş və məktəbin fəaliyyətilə yaxından maraqlanmışlar.

Məktəb rəhbərliyi məlumat verərək bildirmişdir ki, məktəbdə təhsil alan uşaqların bir qismi idmanda böyük nailiyyətlərə imza atmış və hal hazırda ölkəmizi mötəbər beynəlxalq yarışlarda təmsil edirlər.

Daha sonra əməkdaşlarımıza uşaqların qazandıqları kubok və medallar nümayiş etdirilmişdir.

Şirkət adından idmançı uşaqlara 40 dəst idman paltarı və ayaqqabıları hədiyyə edilmişdir. Bundan əlavə uşaqlar üçün məktəb rəhbərliyinə dəftərxana ləvazimatları və kepkalar təqdim edilmişdir.

Əməkdaşlarımızın səfəri yeni il ərəfəsinə təsadüf etdiyi üçün məktəbə 2,4 m hündürlüyündə şam ağacı və oyuncaqlar hədiyyə edilmişdir.

Məktəbin direktoru Xanımqız Şükürova Norm şirkətinə və onun əməkdaşlarına minnətdarlığını ifadə etmiş və bu cür tədbirlərin gələcəkdə davam etdirilməsini arzu etdiyini bildirmişdir.

Bu yaxınlarda məktəbin rəhbərliyi adından şirkətimizə təşəkkür məktubu daxil olmuşdur.

 İldə 2 milyon ton sement istehsal edəcək “Qızıldaş Sement” zavodunun inşası müqaviləsinin imzalanmasından bir il keçir. Layihənin maliyyələşdirilməsi üzrə beynəlxalq maliyyə qürumları ilə intensiv görüşmələr davam etdirilimişdir və Almanyanın və Çinin ixracat agentlikləri tərəfindən layihənin 110 milyon ABŞ dollarlıq hissəsinin maliyyələştirmə üçün ilkin razılıq əldə olunmuşdur.

2011-ci ildə dünyanın dörd böyük müstəqil auditor şirkətlərindən biri olan PriceWaterhouseCoopers Norm MMC-nin 2008 – 2010-cu illərinin maliyyə hesabatlarını Beynəlxalq Maliyyə Hesabatları Standardına görə ilk dəfə olaraq auditini aparmışdır və öz müsbət rəyini bildirmişdir.

Zavodun əsas texnoloji avadanlıqları Almaniyanın və Avropanın digər ölkələrinin ən qabaqçıl şirkətləri tərəfindən təchiz ediləcəkdir. İstehsal xəttində HAZEMAG (Almaniya) şirkətinin istehsalı olan qırıcı qurğu, şaquli xammal dəyirmanı Gebr. Pfeiffer SE (Almaniya), odluq Pillard (Fransa), soyuducu Claudius Peters Ltd (Almaniya) quraşdırılacaqdır. Orta gərginlikli elektrik mühərrikləri və avtomatları Siemens, qablaşdırma qurğusu Haver & Boecker (Almaniya), rentgenoqrafik analiz qurğusu Phillips (Hollandiya) şirkətləri tərəfindən təchiz ediləcəkdir.

Hazırda zavod ərazisinə 10 km uzunluğunda, müasir tələblərə cavab verən avtomobil yolunun inşası başa çatdırılmaq üzrədir. Əraziyə 9 km uzunluğunda yüksək gərginlikli elektrik xəttinin çəkilişi işləri sürətlə davam etdirlir. Bakı-Salyan şose yolundan əraziyə su xətti çəkilmiş və ana xəttə qoşulmuşdur. Ərazinin sel sularından mühafizə sisteminin qurulması işlərinə başlanmışdır.

Növbəti ay ərzində əraziyə qaz boru kəməri, habelə rabitə və internet xidmətlərinin göstərilməsi üçün fiber optik kabel xəttinin çəkilməsinə başlanacaqdır. Zavodun işçi cizgiləri baş podratçı tərəfindən tamamlanmışdır. Zavodun elektrik təminatı çərçivəsində Səngəçal yarımstansiyanın bir hissəsinin yenidənqurulması da şirkət tərəfindən aparılır.

Zavodda tətbiq ediləcək müasir “quru üsul” texnologiyası texnoloji prosesdə minimum enerji sərfiyyatı ilə yanaşı, yüksək keyfiyyətli xüsusi sement növlərinin istehsalına imkan verəcəkdir.

Zavodun tikintisi qeyri-neft sektorunun ən böyük investisiya layihələrindən biri olub təxminən 400 milyon ABŞ dollarına başa gələcəkdir. Bu layihə yeni iş yerlərinin açılması baxımından da böyük əhəmiyyət kəsb edir. Belə ki, zavodda bilavasitə 400 nəfər, xammal mədənlərində isə 100-150 nəfər fəaliyyət göstərəcəkdir.

Bundan əlavə istehsaldan satışadək, o cümlədən kimya, nəqliyyat, yanacaq, qida və digər xidmət sahələrində daha 2500 nəfər ümumi dəyər zəncirindən bəhrələnəcək ki, bu da 3000-ə yaxın ailəni gəlirlə təmin edəcəkdir.

Layihədə sənaye obyektlərinin tikintisilə yanaşı zavod ərazisinin və ətrafın abadlaşdırılması və yaşıllaşdırılmasına, xammal yataqlarının təhlükəsiz istismarına və rekultivasiyasına, yerli infrastrukturun inkişafına, ətraf qəsəbələrdə yaşayan insanların həyat standartlarının yaxşılaşdırılmasına xüsusi diqqət yetirilir.

Hal hazırda tikinti meydançasında hazırlıq və planlama işləri həyata keçirilir. 2013-cü ilin iyul ayında ilkin sementın istehsalına başlanacaqdır. Həmin ilin 4-cü rübündə zavodun tam gücü ilə istismara verilməsi nəzərdə tutulur.

Qeyri-neft sektorunun ən böyük investisiya layihələrindən biri olan “Qızıldaş Sement” zavodunun inşası Azərbaycanın iqtisadi və sosial inkişafında böyük rol oynayacaq və ölkənin daha da qüdrətlənməsinə xidmət edəcəkdir.

 Layihənin sosial sahəyə təsiri çərçivəsində ətraf qəsəbələrin sosial-iqtisadi durumu ilə əlaqədar tədqiqatlar aparılmış, layihənin müsbət və mənfi təsirləri araşdırılmışdır. Layihə ərazisində əhalinin demoqrafik tərkibi, ərazidə mövcud infrastruktur, kommunal xidmətlər, əhalinin həyat şəraiti, məşğulluq, gəlir səviyyəsi, səhiyyə və təhsil, əhalinin təxirəsalınmaz ehtiyacları araşdırılmışdır.

Mövcud statistik məlumatlar və yerli və beynəlxalq təşkilatlar tərəfindən hazırlanmış hesabatlar araşdırılmışdır. Ətraf qəsəbələrdə yaşayan əhalinin layihə ilə bağlı məlumatlandırılması, onların və digər maraqlı tərəflərin rəyinin öyrənilməsi istiqamətində tədbirlər həyata keçirilmişdir.

Layihə ərazisinin yaxınlığında yerləşən Səngəçal, Umbaki, Ümid və Sahil qəsəbələrinin sakinlərilə görüşlər keçirilmiş, zavod, onun fəaliyyəti, rayonun və ümumilikdə ölkənin sosial-iqtisadi həyatında əhəmiyyəti, ətraf mühitə təsiri barədə məlumat verilmişdir. İlk ictimai dinləmələr 2009-cu ilin noyabr ayının 3-də Qaradağ rayonunun Lökbatan qəsəbəsində, 166 saylı məktəbdə keçirilmişdir.

Layihənin həyata keçirilməsində ictimiyyətin rolunun artırılması, mümkün mənfi təsirlərin aradan qaldırılması və layihənin regionun sosial-iqtisadi həyatına maksimum fayda verməsi məqsədilə sorğular keçirilmiş, bukletlər hazırlanmış, mətbuatda məlumatlar dərc etdirilmişdir. 2010-cu ilin yanvar ayının 29-da ekoloji və sosial təsirlərin qiymətləndirilməsilə bağlı ətraf qəsəbələrdə yaşayan sakinlər, yerli icma və qəsəbə nümayəndələri, bələdiyyələr, QHT-lər, mətbuat nümayəndələrinin, digər əlaqədar və marağı olan tərəflərin iştirakı ilə Hyatt Regency mehmanxanasının “Quba” konfrans zalında dinləmələr keçirilmişdir. Bu tədbirlə bağlı bütün marağı olan tərəflər dəvət edilməklə yanaşı mətbuatda elan verilmiş, arzu edənlər tədbirdə işitrak etmək üçün dəvət edilmişlər.

İştirakçılar Norm-“Qızıldaş Sement” Zavodunun işsizlik probleminin həlli, infrastrukturun yaradılması, ölkə iqtisadiyyatına faydası, ətraf qəsəbələrdə yaşayan əhalinin sosial-iqtisadi vəziyyətinin yaxşılaşdırılması, ərazidə yeni sosial layihələrin və proqramların həyata keçirilməsi, ölkədə yüksək keyfiyyətli sement istehsalı və sementin qiymətinin aşağı düşməsi kimi məsələlərdə ətraf qəsəbələr və ümumilikdə ölkə üçün faydasını vurğulamış, bu məsələlərin həllində yardımçı olacağına ümid bəsləyərək Layihəni müsbət qarşılamış və dəstəkləmişlər.

Bununla yanaşı fokus-qruplar həyata keçirilmiş, marağı olan tərəflərdən müsahibələr alınmış, evlərdə ailələrlə görüşlər keçirilmiş, sorğular aparılmışdır. Səngəçal, Ümid və Ceyildağ qəsəbələrində 400 evdə (1880 nəfər) görüşlər keçirilmiş, müsahibələr alınmışdır. Bu qəsəbələrdə qadınlar, gənclər və ümumi icma qruplarının nümayəndələrilə görüşlər, sorğular və müzakirələr keçirilmiş, onların tələb və ehtiyacaları, habelə layihədən gözləntiləri öyrənilmişdir. Bu görüşlərdə əsas etibarilə kommunal xidmətlər, infrastruktur, yol, səhiyyə, təhsil, nəqliyyat, xüsusilə də işsizlik əsas problem olaraq qeyd edilmişdir.

Layihə rayonun sosial-iqtisadi həyatına müsbət təsir göstərəcəkdir. Yeni iş yerlərinin açılması, yeni infrastrukturun yaradılması, kommunikasiya xətlərinin çəkilməsi və s. ətraf qəsəbələrdə yaşayan insanların həyat şəraitinin yaxşılaşmasına xidmət edəcəkdir. Zavod istismara verildikdən sonra yolların bərpasına yardım, həmçinin idman komplekslərinin yaradılması nəzərdə tutulub. Təhsil sahəsinə gəlincə Qızıldaş qəsəbəsində köhnə peşə məktəbinin bərpa edilməsi və bu məktəbdə zavod üçün ixtisaslı fəhlələrin yetişdirilməsi planlaşdırılır.

İştirakçılara məlumat verilmişdir ki, ərazidə idman və sağlamlıq meydançaları, parklar yaradılacaqdır. Təkcə ətraf qəsəbələrin sakinləri üçün deyil, bütövlükdə rayon sakinləri üçün yeni iş yerləri yaradılacaqdır. Zavodda bilavasitə 500 nəfər, ticarət, səhiyyə, kimya, nəqliyyat, qida və digər xidmət sahələrində isə 2500 insan üçün yeni iş yerlərinin yaradılması gözlənilir ki, bu da 3000-ə yaxın ailə üçün gəlir mənbəyi deməkdir.